A Sant'Andria in e ciucciaghje municipale

Quist’annu, a ciucciaghja di Mezavia hè stata accolta da un associu di u listessu quartieru : l’ACLAM. Una vintina di zitelli, Davia Santoni a dirittrice, l’agenti di a ciucciaghja di Mezavia, Monique Santoni di u sirviziu Lingua è Cultura Corsa di a Cità d’Aiacciu sò stati accolti da Julien Casanova (Prisidente di l’ACLAM) è parechji membri di l'associu.
Annie Costa (Aghjunta municipale delegata à a zitillina) era prisente par sente cantà i zitelli a pricantula didicata à Sant’Andria ! Dopu, i zitelli anu ballatu u quatrigliu è ancu fidighjatu a dimustrazione d’unu di i 25 attelli chì l’ACLAM prupone à i so 300 membri : un corsu di « taï chi ».
Dopu à l’attività spurtiva, i membri di l’ACLAM avianu priparatu un visparinu da raligrà tutti sti zitelli famiti è a spartera si fece in u rispettu di a tradizione di a Sant’Andria : biscotti, clementine è biende à vulintà da cuntintà chjuchi è maiò.
Par compie a ghjurnata, i membri di l’ACLAM avianu appruntatu un rigalu par ogni zitelli è funu chjamati tutti da riceve un sacchittellu carcu à frutti è biscotti in ricordu di sta bella ghjurnata passata cù assai fraternità trà e ginerazione.
Fù una riescita maiò è a prumessa si fece di truvassi un antru annu da fistighjà torna à Sant’Andria inseme : « Aprite aprite à Sant ‘Andria, ch’ellu hà fattu longa via… ».